廿五個


個人分享
Tagged With: , , , , , , , , ,

話咁快又一個月,好似啱啱先至同郭大少慶祝完生日無幾耐。好快佢就開始校園生活,原本以為佢咁癡我哋,點都會有啲分離恐懼症,點知嚟個小朋友竟然完全可以唔理我哋,自己去上堂。咁應該到真正開學嘅時候,相信唔會出現爆喊同難捨難離嘅情況。不過佢真係好鍾意返學嘅小朋友,有次出去食晏,點知佢一出門口就話要返學,但係嗰日係星期日邊度有學返嚟?

廿二個

郭大少真係一個好有主見嘅小朋友,而家好多嘢都要自己嚟,自己揀,唔啱心水就發脾氣!當然可以話佢硬頸,死硬派,不過如果佢大個咗之後將嚟種執著用係適當嘅地方,相信好多嘢都應該難佢唔到。雖然每個小朋友都有佢難搞嘅一面,但係如果用另外一個角度睇嘅話或者係佢哋嘅優點,只係有時就算你想咁諗嘅時候,往往都會被佢激到你紮紮跳!

廿一個

小朋友一個月一個月咁成長,時間真係過得好快,快到一個地步上年仲係爬爬下,今年就已經識行識走。過多幾個月就已經兩歲,開始返學,真係想像唔到!當然見到自己個仔一日一日長大真係好難去形容,原本係一個食飽就瞓,瞓飽就食嘅嬰兒,到而家所有嘢都有自己嘅主見,有自己嘅要求。有時真係唔想佢大得咁快,因為到時就唔會再黐實我哋。