其實究竟大家認識「古天樂」有幾多呢？我相信大部份人會因為多年前嘅處境劇「餐餐有宋家」而認識佢。如果係年輕嘅一輩或者係因為佢所演出嘅電影！當然好多人都會因為佢嘅普通話同以前佢出過嘅歌而取笑佢。不過重點係就算佢名成利就，佢做咗好多公益嘢其實無人知，直至近年有傳媒報道先知道佢原來做咗咁多嘢。有時做善事真係唔需要大鑼大鼓，公告天下！

公司要轉型其實唔係一件易事，因為通常都會有好多歷史遺留落嚟嘅問題要去面對同解決。如果係一間百年老店就更加難，因為最難處理嘅員工嘅心態。有啲人會覺得係危機，有啲人就會覺得係機遇，所以好視乎員工點樣睇每一次嘅改革同轉型。當然無人可以咁寫包單一定會成功，只不過如果係士氣高昂嘅時候轉型，成功率一定大過士氣低迷嘅時候。

過去十年嘅變化實在太大，因為智能手機，平板電腦，社交媒體，網絡速度等等嘅出現改變咗我哋嘅生活模式。所有嘢都係講求一個快字，有時候快到一個地步基本上跟都跟唔切。我哋嘅新世代基本上一出世就已經係一個咁嘅環境成長，可想而知佢哋嘅生活模式會同我哋好唔同，因為我哋以為自己好前衛，其實已經俾佢哋唾棄。

開放數據係可以牽涉到好多層面，而要社會進步就要有效地將開放數據同其他類型嘅數據結合，咁樣就可以發揮到更大嘅經濟效益。政府擁有嘅數據係最應該開放俾公眾去使用，因為大環境嘅數據係好難去靠企業或者大眾去收集。好多數據例如醫療，交通，房屋，教育等等，其實都係好有用。至於係應用層面方面就好視乎分析數據嘅目的。不過最重要嘅就當然係開放咗啲數據出嚟先啦！

好多人返工只係為咗份工，因為返工係為咗生活。但係如果你問大部份嘅人你鍾唔鍾意份工，又或者愛唔愛你自己嘅工作，我相信大部份嘅答案係唔鐘意同唔愛。其實如果你唔愛自己嘅工作，日復日，年復年，老實講又點會做得好呢？因為工作嘅目的同出發點根本就唔係要做好件事，而最緊要嘅係無愛！愛一份工好難，愛一個專業更難！所以做嘢係要搵一樣自己愛嘅嘢去做先至會成功！