串起嚟

做數據分析通常第一件事就係發現會有好多唔同嘅數據係唔同嘅部門,唔同嘅格式,同唔同嘅數據庫。而大家嘅關連性係可有可無,只係有無一條鎖匙可以將原本無關連性嘅資料串連起嚟。咁就可以將比較單面嘅訊息立體化。當然要全面了解客戶行為係冇可能嘅事,但係最起碼將客戶已經提供嘅資料整合,之後就有機會搵到一啲新嘅資訊幫到自己嘅業務。

收數佬

做數據分析就好似收數佬咁要用盡方法去收數。最怕就係收到啲收唔到啲,因為如果唔係就無辦法反應實際情況。除咗要了解收集數據嘅平台之外,其實好多時都需要少少技術嘅知識。所以用十八般武藝去形容,其實一啲都無誇張!所以要有效咁收集數據係要宏觀去睇,無可能只係專注一點。因為要將數據有效串連一齊係需要一條鎖匙,如果唔係就會分開一節節!

點分析

真係唔經唔覺做咗數據分析嚟個行業十幾年,不過咁多年嚟遇到嘅問題都係大同小異。最關鍵嘅問題唔係用啲乜嘢工具去收集數據同分析數據,而係究竟點解要數據!好多公司都覺得數據係免費,就算你用 Google Analytics 嘅免費版本都好,背後其實有好多功夫要去做。正所謂一子錯滿盤皆落索,因為開始嘅時候根本無好好咁計劃點樣收集數據,所以當開始分析數據嘅時候先至發現好多問題,與此同時亦都解答唔到任何問題。

上網學

上網學嘢當然唔係今時今日先流行,其實咁多年嚟我所學嘅嘢大部份都係網上面學。以前網站同教學都係文字為主,而家就文字加短片。睇完教材自己埋頭苦幹咁不斷試,試到得為止。最緊要嘅係唔怕失敗,不過當然亦有時候遇到樽頸位,但係亦都可以上網去請教其他人,因為世界這麼大,一定有人幫到你!而近期就唔使講,個個都上網開直播,整教學,真係唔怕宅係屋企無嘢做!

新嘗試

實想做網上教學都一段時間,只係無真係好認真同投放資源去再做好啲。當然今次嘅疫情推動咗唔少嘢,而大家都應該成就解鎖咗好多嘢,當然包括視像會議。以前係大公司其實嚟類嘅會議大把,日日如是,所以都已經好習慣個模式。雖然今次係分享,純粹乜都講啲,試下大家嘅反應。不過始終係第一次,所以總有啲嘢甩漏。就算事前試好晒所有嘢,最後都係賴嘢!