要成功要經過六個階段？當然首先要確保自己可以生存落嚟，如果唔係講乜都無用！沉潛等待，堅持落去，因為成功係需要時間。要肯定自己過去所累積嘅經驗同實力，要記住自己比想像中更強。要假裝成功，但係假裝成功，唔等於講大話，亦都唔係裝俾人哋睇，而係俾自己睇。好多時會同人比較，但係真係唔好同已經成功嘅人比較，因為好容易令自己陷入自我批判嘅負面情緒中！

好多人會問創業同做生意嘅分別係啲乜？我個人嘅理解係創業都係一盤生意，但係好多時都係希望去改變現今社會，與此同時好多嘢係由零開始。而做生意其實可以係一啲已經成熟嘅行業，就例如賣衫，做飲食咁，其實唔係一啲乜嘢嘅新嘢，亦都唔會對社會帶嚟啲乜嘢改變。當然到最後創業都係一盤生意，都係要賺錢，而做多時做大咗之後有可能忘記當初點解要創業。

相信好多做服務性質嘅公司都經常要報價俾客戶，而好多時除咗報價之外都需要先做一份計劃書。不過好多公司只係因為內部流程需要，要搵幾間公司去報價，所以基本上只係陪跑。辛辛苦苦做嘅計劃書對嗰啲公司嚟講只係一份功課，而有啲甚至乎想要你嘅橋，所以有時做又唔係，唔做又唔係。到最後其實就算你份計劃書做得有幾好，你報嘅價錢係幾平與貴都唔係關鍵。

好多時做生意係好講求業務嘅定位，而定位除咗指業務嘅對象之外，其實仲有價格嘅定位。當然任何業務都要了解市場是需要同承擔能力，如果市場係無需求嘅話，就算價格幾便宜都好，其實都唔會有生意。所以公司嘅定位係好緊要，但係有時因為環境嘅問題，公司嘅定位亦都會作出唔同嘅改變。不過亦都有好多公司係改變公司定位嘅時候作出錯誤嘅決定而衍生更多嘅營運問題。

好多時做嘢係要膽大心細，做生意嘅更加要面皮厚。有時做決定係需要當機立斷，但係好多時都會驚做錯決定，不過如果唔做決定嘅話，或者會錯過咗某啲時機。所以決定咗就唔好諗返轉頭，因為通常你都會發覺自己忽略咗好多細節。不過經一事長一智，慢慢就會變得更加細心，去留意細節。話雖如此，好多時仍然粗心大意，真係要慢慢嚟，唔好急！