近排多咗人問我開網店嘅嘢，或者真係而家嘅市場情況。如果大家真係想開網店嘅話，我都會建議大家去了解下「掌舖」。雖然我認識佢哋嘅創辦人，不過我唔係幫佢宣傳，亦都唔需要！你睇下佢有幾多客先啦！而最出名嘅都應該係「女鞋國」莫屬！當然到最後都係要記住一樣嘢，因為係好緊要！就係，你賣啲乜同香港最難搞嘅物流。不過「掌舖」都應該會幫到你！

公司要轉型其實唔係一件易事，因為通常都會有好多歷史遺留落嚟嘅問題要去面對同解決。如果係一間百年老店就更加難，因為最難處理嘅員工嘅心態。有啲人會覺得係危機，有啲人就會覺得係機遇，所以好視乎員工點樣睇每一次嘅改革同轉型。當然無人可以咁寫包單一定會成功，只不過如果係士氣高昂嘅時候轉型，成功率一定大過士氣低迷嘅時候。

仲記得啱啱開公司嘅時候，基本上只要行入去銀行話要開個戶口，跟住填啲資料然後基本上就可以開到戶口。但係今時今日就好唔同，好多要提供無數嘅資料，有啲仲要問你拎唔同嘅文件。如果你係一間新嘅公司，基本上要開戶口真係天方夜譚嘅事。最大問題嘅係有啲銀行要你存入最低戶口結餘，只不過試問一間新嘅公司又邊度有錢呢？而好多初創公司就連業務都未有，邊度搵啲錢比你呢？

要成功要經過六個階段？當然首先要確保自己可以生存落嚟，如果唔係講乜都無用！沉潛等待，堅持落去，因為成功係需要時間。要肯定自己過去所累積嘅經驗同實力，要記住自己比想像中更強。要假裝成功，但係假裝成功，唔等於講大話，亦都唔係裝俾人哋睇，而係俾自己睇。好多時會同人比較，但係真係唔好同已經成功嘅人比較，因為好容易令自己陷入自我批判嘅負面情緒中！