逼出嚟
對於好多人嚟講，以前係屋企工作可能係一大挑戰，而好多公司都或者未試過咁大規模咁要員工係屋企工作。過去兩個月好多人都應該已經慢慢習慣，係屋企做嘢唔代表量地，亦都唔係冇嘢做，相信好多家長而家先至會明。而對於我嚟講，其實係無分別因為早就已經習慣嚟個模式。好多嘢都係迫出嚟，如果無今次嘅疫情，相信好多嘢都只係原地踏步。所以我經常講任何時候都要處於危機狀態，咁先至會有突破，唔好諗住樣樣嘢都順風順水。
上網學
上網學嘢當然唔係今時今日先流行，其實咁多年嚟我所學嘅嘢大部份都係網上面學。以前網站同教學都係文字為主，而家就文字加短片。睇完教材自己埋頭苦幹咁不斷試，試到得為止。最緊要嘅係唔怕失敗，不過當然亦有時候遇到樽頸位，但係亦都可以上網去請教其他人，因為世界這麼大，一定有人幫到你！而近期就唔使講，個個都上網開直播，整教學，真係唔怕宅係屋企無嘢做！
整網站
二十幾年前，係呀講緊上世紀嘅事呀，啱啱學寫網站嘅時候真係慢慢一行行咁寫。去到今時今日整一個網站真係簡單到一個點係一個鐘頭就已經有嘢睇。由買 Domain 到 Hosting 再安裝埋 WordPress 最多搵個 Theme 裝好晒真係超方便。而家有啲甚至乎好似 Elementor 嘅 Plugin 咁，可以自己左切右切，真係俾少少錢就可以輕而易舉咁搞掂一個網站！
一條龍
好多公司都想做到一條龍嘅服務，有啲係因為貪心，有啲係想提供更好嘅服務。而好多客戶都唔想煩，尤其係去管理唔同嘅服務供應商，而且合作開有默契。當然搵一個人好過搵十個人，只不過係唔係所有嘅服務範圍都係佢哋嘅強項。當然有時要衡量好多唔同因素，而大部份嘅公司會注重價錢同質量，所以好多時都要取捨。但係依家環境唔同，所以好多公司都會搵啲專業啲嘅公司去處理唔同嘅服務。
定勝負
好多時當你以為自己贏梗嘅時候就會開始放慢腳步，點知就因為咁樣輸咗。其實係唔係有少少好似龜兔賽跑呢？一日未過終點，一日你都仲係未贏，那怕只係嗰一剎那，就係咁你就輸咗。所以一定唔好咁快以為自己贏硬，又或者打定輸數，勝負其實真係一線之差，只要由頭到尾都用盡全力去應付，就算最後輸咗又點？最緊要對得住自己，任何時候都全力以赴！