告別了


個人分享
Tagged With: , , , , , , , , ,

「生離」

人到咗某啲年紀就要經歷生離死別,雖然明白嚟個道理,人總會離開呢個世界。當然人老去係自然定律,不過當你身邊有相約年紀嘅朋友離開嘅時候,自自然然又會反思究竟人其實係幾咁脆弱。係唔係真係去到失去先至去回憶,去珍惜係自己人生出現過嘅每一個人。係唔係將所有嘢變得太過理所當然?相信大家總有機會再見,相信人生仍然有大把時間,但係到最後其實再無咁嘅機會。淨落嚟嘅只係腦入面嘅回憶同畫面。

「朋友」

其實我真係好怕好怕聽到身邊嘅朋友患病嘅消息。雖然依家科技發達,可以通過社交平台知道身邊嘅朋友發生緊嘅事。但係其實都只係好表面。朋友嘅關係唔係只係社交媒體讚一讚啲相或者留個言,亦都唔係只係透過通訊軟件隔空互通訊息。朋友真係需要見面,尤其係嗰啲由細識到大嘅朋友。當然今時今日係比較難,因為大家都各散東西,不過如果有機會嘅話,真係希望時間可以返去大家年青嘅時候,一齊嘻嘻哈哈。

「告別」

今日收到你離去嘅消息雖然唔驚訝,因為早前已經知道你嘅情況,只不過都係有啲難以接受你嘅離去。可惜嘅係好幾次都無機會見到面,只係有時係社交媒體度睇下你嘅近況。你係一個永遠帶著歡笑去過每一日嘅人,你燦爛嘅笑容相信大家都會永記於心。雖然有好幾次都想留言俾你,但係始終唔知同你講乜嘢好,或者自己真係好怕面對自己嘅朋友離去。係度同你講聲道別,希望你一路走好。告別了,希望有機會再次重遇!