五十九

「六月」

我諗今個月最開心嘅就係迪士尼開返!因為又可以唔駛諗同佢去邊放電。當然依家要預早七日訂位,不過好彩係佢開返嘅第一個星期六已經可以去到。真係整整五個月無去過,而感覺好似第一次去咁見到啲新嘢都會話嚟啲之前無㗎喎!除此之外,今個月真係唔記得去咗幾多次海灘,真係一好天同有時間都會去,因為真係唔知同佢可以做乜。之前諗住佢大個咗可以試過去行街,但係到最後都係搵自己嚟搞。有話攰,又話悶,真係激死!

「長大」

仲有唔夠一個月,郭大少就五歲。依家已經自己可以搞掂好多嘢,雖然係咁,但係依然經常性要我幫佢做嚟樣個樣。口就叫佢自己搞掂,但係心底裏就會諗,其實再過多一兩年佢就唔再需要我嚟個又煩又譖嘅爸爸。自己應該好好珍惜佢仲肯黐住自己嘅日子。有時同佢講我兩兄妺都錫,點知佢就會呷醋話要錫佢多啲。其實相比起郭千金,我真係陪佢嘅時間多好多。只係希望兩兄妹可以開開心心咁過每一日。

「正常」

今個月基本上好多嘢都回複正常,我亦繼續做佢嘅司機同佢去上堂。當然好耐無上嘅游水堂終於開始返。開頭仲以為佢會好似冬天咁,游兩游就話唔游要上水。點知佢游足一個鐘,而且開始可以自己透氣。或者佢真係有運動天份?當然睇下佢自己鍾意啲乜嘢運動啦,但係單車同游水嚟兩樣男仔別定要學識嘅嘢都已經搞掂,真係可以同佢挑戰下啲其他運動。不過今個月都真係好熱,有時佢都唔肯出去玩,話自己熱到出晒汗喎。