爸爸節

「角色」

做咗爸爸嚟個角色接近五年,當然一個小朋友同兩個小朋友嘅分別其實都幾大,真心佩服身邊啲朋友有三個甚至乎四個小朋友。有時都會諗其實係佢哋心目中究竟我係一個點樣嘅爸爸,自問未必係一個最好嘅爸爸,有時真係想陪佢哋多啲,同佢哋玩多啲。雖然話今年有疫情,但係其實上半年係少咗時間陪佢哋。有朝忙到晚,有時淨係想攪掂晒所有嘢可以做返自己嘢。

「環境」

養兒一百歲,長憂九十九。以前細個真係唔係太明,但係做咗人哋嘅父母就明白點解係長憂九十九。當然最希望嘅係可以提供最好嘅資源同環境俾佢哋長大,不過真係仲差一大段距離!其實最擔心嘅就係學習嘅環境,而現時香港嘅情況其實真係唔係太過理想。而好多人都會問點解可以走唔走,老實講我都好想,尤其係為咗下一代。雖然自己去湊佢哋係辛苦,只係係希望佢哋記得嘅係有個爸爸陪佢哋成長。

「階段」

當然近年其實都只係見步行步,可以做嘅都盡量做。無嘢緊要得自己嘅仔女,而同時都要開始為自己退休計劃。最希望嘅就係老咗唔好成為佢哋嘅負擔,所以不斷諗究竟之後十年要做啲乜?十年後就已經五十歲,已經毫無競爭能力,唯一嘅就只係經驗同知識。到時兩個開始步入青春期,又係另外一個人生階段。唔知佢哋仲會唔會好似依家咁,事無大小都會叫我去睇下佢哋做乜。