「困難」
好多時大家覺得好容易嘅嘢，其實對於大部分嘅人嚟講原來係好複雜同好難明。莫講話搞網店做生意，就算連點樣註冊域名同開個公司電郵，十分鐘嘅嘢就已經可以考起好多人。所以要將好技術嘅嘢簡單化，要用平民百姓都聽得明嘅語言去教人點樣開網店，甚至乎用數據去了解客戶同投放廣告，其實真係一啲都唔容易。要落地首先要將複雜同技術術語平民化，如果唔係真係雞同鴨講。
「課程」
係編寫課程嘅時候其實最大問題係要將自己嘅知識有系統性咁寫返出嚟，然後再用大家聽得明嘅方法去解釋。當然好多時大家都想上一啲所謂嘅雞精班，因為實用同即刻可以用，而唔需要理會背後所謂嘅理論，概念同操作。當然最緊要係個結果，不過通常好快又要再上過堂，原因係科技發展嘅速度太快，嗰頭學完，跟住又有新嘢出。所以而家有啲課程唔係逐個計，而係用訂閱嘅方式去計。
「網上」
當然另外一個大嘅問題係面對面同係網上面課程嘅分別。平時面對面嘅課程好多都係三個鐘頭左右，而網上嘅課程就通常一個鐘頭一節就已經差唔多。兩種嘅課程方法好唔同，因為面對面你可以睇到大家嘅表情，然後再作調整。但係網上面嘅課程就比較難，因為睇唔到學生嘅反應，同時亦都無咗人與人之間嘅互動。當然網上教學係需要更加落地，同時節奏亦都要比起實體課程要更加快同輕鬆，等大家可以更加有興趣上堂。
