十年的

「十年」

十年前決定放棄高薪厚職,開始籌備自己公司,用六個月一邊返工一邊準備,希望用十年做自己想做嘅嘢。十年後嘅今日,覺得十年原來比想像中快,快到自己都唔知做咗啲乜,甚至乎覺得比起十年前更加倒退。近嚟五年嘅轉變就更加大,尤其係郭大少出世之後。如果再比我揀過會唔會揀同一條路?十年期限到了,下一步究竟係點?其實近年嘅問題不斷重複,真係有啲攰。放棄,堅持依然係一大個問號。

「今日」

如果我十年後再睇返今日寫嘅嘢究竟有啲乜嘢感覺。或者就好似時間囊咁,記錄今日嘅心情。有次同朋友傾計,唔知係唔係去到中年,開始有啲模稜兩可嘅年紀。因為再唔係好似十年前咁有嗰種衝勁,亦都唔會仲以為自己好後生,有大把時間。如果再過多十年,基本上只會越嚟越少選擇。如果用空洞去描述今日嘅自己都應該幾貼切。因為有好多嘢要處理,但係就好似老鼠拉龜咁,無咗某種動力。

「將來」

當然選擇邊條路都係自己揀嘅,所以無得賴任何人。任何嘅結果都係自己揀嘅!當然有諗過過返正常人嘅生活,但係原來係行唔通,所以又係要硬着頭皮繼續行。會唔會試下轉換環境?當然如果係一支公又或者無負擔同憂慮嘅話,其實應該已經轉換咗。往後十年真係摸不清,睇不透。點樣行,行去邊,其實真係唔知。而家都只係逆來順受,因為諗太多都好似無用,倒不如就由佢船到橋頭自然直?寄予十年後嘅自己,記住自己嘅座右銘!生命並不在乎長短,只在乎精彩!