「女仔」
邊個話女仔易湊啲㗎？不過女仔就真係有啲脾氣，有時真係唔知道佢扭啲乜嘢。當然依家識行識走，同隻甩繩馬騮無分別。本來以為女仔會定啲，安靜啲，但係真係比起郭大少更加嚴重，真係以為生多咗個仔。話雖如此，佢又唔係嗰啲唔怕陌生人嗰啲，見到唔識嘅都需要啲時間去適應。希望之後返學會好啲，相信唔會好似郭大少咁一支箭咁衝咗入去連回頭望都唔望。
「成長」
今個月郭大小姐都係依然宅係屋企多，不過因為要返醫院覆診，所以焗住要同佢去抽血同睇醫生。好彩驗血結果叫做正常，雖然可以嘗試停止食藥但係安全起見，醫生依然建議繼續食到三歲再睇情況。所以之後依然要按時去覆診，只係每次見到佢要俾人捉去抽血真係心都痛埋。希望快啲唔駛再覆診啦！雖然佢無好似郭大少咁一早返學，但係佢都好醒目，好聰明，好多嘢其實佢都明，只係聽唔聽又係另一回事！
「趣事」
依家大個咗，要求多咗，鍾意同唔鍾意都會表達出嚟。每朝起身都叫我俾包佢食，俾水佢飲，之後有時食完又去瞓多陣。因為晏晝通常都要去做嘢，有時打電話俾佢哋，佢都好興奮咁見到我。夜晚返到屋企就好熱情咁搵我，話你終於返嚟啦！依家夜晚瞓覺雖然終於肯瞓自己張床，但係就要我陪佢聽歌，拖住佢隻手先至肯瞓。真係服咗佢！之前因為見到有小朋友孭住背囊，而家出街都要孭個先知出街，真係笑死你！希望你繼續好好心心咁成長啦！
