「方言」
每個地方都有自己嘅方言，就算香港係講廣東話都好，其實同傳統嘅廣東話好唔同。只不過好多方言因為越嚟越少講，亦都唔普遍，所以慢慢就消失咗。當然中國係一個好好嘅例子，因為好多地方都有自己嘅方言，只不過因為官方語言，新一代返學都係學普通話，所以慢慢應該方言就會消失。其實唔知有無人紀錄低啲方言？除咗係保留當地原始語言之外，最主要就係唔希望佢消失。
「傳統」
由細到大都聽嫲嫲同爺爺講福州話，當然真係大個先知道福州話係方言啦。就係咁因為由細聽到大，所以自己依家係識聽，只係唔識講。有時係街聽到啲人講福州話都自自然然望一望。但係真係唔講唔知原來福建省有好多方言，而好多人以為台灣人講嘅閩南話係福建話，但係因為我聽唔明，原因係台灣嘅閩南話結合咗泉州話，漳州話同廈門話。所以就好似香港人講嘅廣東話，都唔係個個地方都明。
「懷念」
點解無啦啦講起方言？其實因為諗起嫲嫲同爺爺。因為真係除咗佢哋同一啲親戚之外，其實應該無人再會同我講福州話。當然應該唔會唔識聽，只係好似普通話同英文咁。返咗嚟香港都十幾年，真係發現自己啲語言能力減退緊。有時語言真係好靠環境去鍛鍊，如果無環境，想進步都真係比較難。其實全世界仲有幾多方言呢？你自己又識唔識任何方言？
