燕皮餃

「燕皮」

究竟乜嘢係「燕皮」?其實精選豬嘅前後腿啲瘦肉,再配以澱粉,鹽等嘅調味料,然後通過手工打制,做到薄如白紙,色澤潔白嘅餃子皮。如果將「燕皮」切成絲,咁就變成燕絲,係可以即刻拎嚟煮食。至於餡料就可以用鮮魚肉,五花肉,一齊剁成泥,然後加入調味料拌攪勻。之後再將「燕皮」切成兩寸方片,一手拎住燕皮,一手用筷子將適量嘅餡料放入燕皮入面,最後捏緊就可以形成燕尾嘅形狀。整好後可以蒸大約五分鐘,又或者直接煮嚟食都得。

「福州」

唔知有幾多人知道乜嘢係「燕餃」,就算知道又或者真係食過都應該以為係台灣嘢。但係其實「燕餃」係福州嘅一道著名地方風味小食。佢同平時嘅餃子唔同,因為餃子皮其實係用肉做。因為屋企係福州福建人,所以由細到大,嫲嫲都會包「燕餃」。但係而家可以食到嘅機會就真係淨返佢之前包落而仲雪咗係冰格嘅少量「燕餃」。就算係之後食到,相信都無嫲嫲整得咁好食,因為嗰個係嫲嫲嘅味道。

「味道」

講起嫲嫲嘅味道其實仲有好多,例如以前佢會自己手打魚蛋,新年必食嘅長壽麵,自己釀酒嘅酒糟炸魚柳,酒釀豬肉等。每一味餸都係由細食到大,而亦都唔記得對上個次係幾時食過。而家真係只可以懷念嗰種味道,亦都無機會再食到嫲嫲親手整嘅嘢食。而有時依然覺得你仍然係度,或者真係一直未接受你離開嘅事實。每次開冰格見到啲燕皮餃就會諗起你,亦都真係唔敢再煮嚟食,因為怕以後再無機會食到你整嘅味道。