被動的

「移民」

好多人都會諗移民,而通常第一樣嘢就會諗嘅就係點樣生活。當然去到新環境,有無嘢做都真係幾緊要。除咗要面對新環境,新生活之外,如果從來無去過其他地方工作嘅話,其實都會係一個幾大嘅挑戰。今日同朋友傾開,依家科技發達,其實好多時都可以遙距工作。只要香港有個對口,其實都唔會有太大嘅問題,尤其今次疫情改變咗好多營運嘅模式。

「收入」

人大咗,其實再唔可以好似年輕嘅時候咁係咁衝。除咗因為負擔多咗,要顧及嘅嘢多咗,而最大嘅問題應該係體力。當然你可以做唔停,但係就會開始諗究竟自己可以咁樣做嘢做到幾多歲?唔通真係死做爛做,就算到六七十歲都係咁做?而且個個都想移民但係又未必想去其他地方從頭開始,所以好多人都會諗點樣可以賺多啲同增加被動收入。咁就算移民都唔使太過擔心收入來源。

「被動」

其實被動收入有好多種,當然香港人就係買樓收租,又或者好似以前咁買啲派息穩定嘅股票,咁退休嘅生活就可以輕鬆啲。只不過唔係個個都有咁嘅條件,而對於做開同科技有關嘅行業,大多數都會諗去建立一啲平台,或者產品。而另外一個近年比較熱門嘅就係網上課程,因為做得好,基本上全世界嘅人都可以俾錢,而在唔需要再依賴實體課程。所以近年都有好多人都出嚟搞課程,但係質素嘅好與壞就真係見仁見智啦!