「升級」
個個今日都真係新屎坑走去升級 iPhone 嘅作業系統，因為要升級咗先至可以將八達通加入自己個電子錢包。除咗手機，八達通都應該係香港人出入嘅必需品之一。當然將八達通加入咗手機之後，你亦都可以用 Apple Watch 去俾錢。因為唔需要密碼嘅關係，俾錢一定快過信用咭。雖然大家都仲有好多問號，但係手機有埋八達通，距離全面使用手機付款嘅年代相信亦都越嚟越近。
「終於」
今日最多人講嘅應該係八達通終於可以透過 iPhone 連結俾錢。當然好多人話等到頸都長， 遲到好過無到。但係中間有好多細節位要注意，尤其係當綁定咗之後，實體卡就用唔到。咁如果無電呢？設計上係無電都可以用到，但係就真係要自己測試下先至知道。而最多人問嘅就係如果自己屋苑係用八達通出入咁點？其實最好都係開多一張八達通就唔使煩啦。
「手機」
八達通已經成為咗香港人嘅一部份，由1997年正式使用到咗而家基本上大部份香港人嘅係佢飲食都可以利用八達通去俾錢。而近年香港亦都興起手機支付，雖然未至於全面普及，但係大家可以見到越嚟越多人用手機俾錢。所以而家如果真係唔記得帶銀包嘅話，有手機就基本上搞掂。甚至乎有銀行已經可以透過手機連接櫃員機攞錢。咁以後仲需唔需要銀包？我諗大家會驚手機無電或者唔見咗手機多啲！
