「失敗」
失敗乃成功之母，係兵家常事。有時係想力挽狂瀾，只不過係唔係螳螂擋車？越失敗，越成功？對上個次覺得挫敗嘅應該係當年啱啱接咗三星嘅項目。當時自己應該壓力爆煲，亦都突然有種莫明其妙嘅挫敗感。其實當時應該開心先至真，因為將無可能變成有可能，但係或者自己覺得沒完沒了嘅工作，問題亦都兜兜轉轉，所以有啲無奈，最後突然好似一條橡筋咁，斷咗。嗰種感覺好難受，但係亦因為太多嘢要處理，所以好快就回覆正軌，繼續大戰三百回合！
「挫敗」
過去幾年實在太多事情發生咗，每日都只係希望將當日嘅嘢處理好，感覺其實真係有啲無奈。問題好似不斷兜兜轉轉，只係將一件件要做嘅嘢處理咗就算。做得啱唔啱，好唔好跟本就無時間去諗。當然感覺唔好，但係真係又無時間去好好諗點樣可以再處理好啲。時不時都會有挫敗嘅感覺，因為唔知點解做，亦唔知為乜做，做咗又好似等於無做。咁究竟咁多年嚟做咗啲乜？
「問題」
當然每個人都會有自己嘅願景，但係亦都因為環境因素，好多人都未必可以控制到。只係希望每日唔會有更多嘅問題出現，但係問題真係天天多，解決一個又出現兩個。問題有增無減，所以真係日復日，過得一日得一日。到底幾時先至可以做返一啲正常嘢？因為疫情嘅出現，又再一次影響一整年嘅計劃。就算幾正面去面對都好，都會有耗盡嘅一日。
