「移民」
香港係八九十年代曾經出現過移民潮，由其經歷咗天安門事件之後，更加多人對回歸後嘅香港擔心。擔心嘅都係自己下一代嘅將來！要去到一個新嘅環境，要適應新嘅生活真係談何容易。當然現今世代好多人都係外國讀書同長大，加上外出旅行比起以前更加容易。所以大家都知道乜嘢地方會適合自己，雖然去旅行同長期居住係嗰個地方好唔同，不過最起碼去過，了解過當地嘅風土人情先啦！
「話題」
最近最多人討論嘅就當然係移民！其實呢個話題係四五年前已經開始，只係大家覺得當時嘅雨傘運動之後，大家依然對香港仲有一絲希望。只不過經歷過去近一年嘅反修例事件，再加上國安法，除咗香港本身嘅問題之外，而家仲要擔心一國兩制變咗做一國一制。好多人其實已經有其他國籍同身份，要離開嘅亦都相對比起以前更易。只係時間問題！而走嘅原因亦都係因為自己嘅下一代。
「去留」
當然好多人話留係香港係需要更加大嘅勇氣！如果無小朋友嘅，住係邊，係邊生活，其實真係無乜所謂。但係為咗小朋友嘅將來，真係要認真咁諗！就一個好簡單嘅問題，究竟你應該教小朋友相信警察係好人定係壞人就已經出現一個好矛盾嘅問題，莫講話去到社會公唔公平同有無公義。如果你問我當然係早走早著。當然亦都有好多人講，你睇下，移民為乜？回歸後未又係無事！都係馬照跑，舞照跳！不過你講緊嘅係 23年前嘅事！香港有無變？大家心裏有數啦！如果可以我都想即刻走，因為真係好想走，只係未走得！
