失自由

「一國」

香港係唔係開始步入「一國一制」嘅年代?所謂嘅五十年不變嘅承諾,而家連一半都未過就已經蕩然無存?因為過去近一年嘅社會風波,因為一個無能嘅特首,搞到依家要中國出手,老實講問題源頭都係因為林鄭!真係多得佢唔少,佢嘅破壞力真係勁過梁振英!香港都真係多得佢唔少,因為而家變咗做夾心餅,淪為世界嘅政治籌碼,何必呢?

「執法」

香港人會唔會因為落實「國安法」就失去自由?好老實講我覺得個問題唔係落唔落實「國安法」,而係嗰班聰明人又衝出嚟懶叻咁指手畫腳去落實所謂嘅「港版國安法」去邀功。講真中國自己已經夠忙,你真係覺得佢哋有時間理啲無謂嘢?如果唔係因為林鄭搞到咁大鑊,其實佢哋都懶得理你啦!而家最大嘅問題係邊個執法同點樣執法,所以大家驚嘅應該係香港嗰班人頭豬腦多啲!

「自由」

當然今次嘅「國安法」其實真係令香港雪上加霜!當然某程度上今次嘅決定係因為持續嘅社會問題一直未解決,另外亦都因為之前區議會大敗,立法會選舉亦在即!所以基於多方面嘅情況,對於某啲利益者當然要保住自己先啦,仲邊會理得你自唔自由啦!更何況好多都有外國戶籍同身份,你攬炒你嘅事,佢哋一走了之你又吹佢唔脹。究竟香港會變成點都真係未知之數,但係都幾肯定只會越嚟越差。