「籃球」
唔知有幾多人睇過「男兒當入樽」？應該咁講，而家仲有幾多後生仔女依然睇漫畫？我哋成長嘅年代，基本上係漫畫不離手嘅年代。當然而家可以上網睇或者用手機程式睇又得，只不過同拎住一本實實在在嘅漫畫嘅感覺係好唔同。而中學時期大部份人都會打籃球，而「男兒當入樽」就好自然成為大家追捧嘅漫畫之一。當然仲有動漫啦！記得試過一口氣由頭到尾一次過睇晒成套動畫！
「遊戲」
有睇過「男兒當入樽」嘅朋友就一定會記得櫻木花道啦！上年蘋果日報亦曾經用佢做咗一個好特別嘅頭版！點解會無啦啦講起「男兒當入樽」嚟套漫畫？原因係因為近日出咗佢嘅手機遊戲，導致我哋嚟班中年人士再一次勾起童年回憶！你今日玩左未？想信大家第一時間就當然係想快啲集齊湘北嘅所有主角啦，有櫻木花道又點少得流川楓，三井壽，宮城良田同赤木剛憲呢？
「故事」
如果你無睇過「男兒當入樽」嘅話，其實係講述一個籃球門外漢櫻木花道為咗追女子，因而誤打誤撞咁入咗「湘北籃球隊」，最後櫻木發現自己慢慢鍾意咗籃球，最後視籃球為生命嘅故事。當然好笑之餘亦都因為我哋個年代真係個個都會打籃球，一聽到的音樂就已經知道係「男兒當入樽」嘅主題曲，搞到而家有少少衝動再一次重溫呢套經典嘅漫畫！
