五十八

「返學」

究竟今年郭大少返咗幾多個月學?我諗都真係一隻手數得晒!對於小朋友嚟講,返學應該係最開心嘅時間,亦都係最寶貴嘅時間。啱啱開學,雖然叫做識咗啲同學仔,只不過斷斷續續咁返下停下,然後直頭整個學期都無得返學見啲朋友。雖然話透過網上可以學習,但係我始終覺得小朋友係需要有社交接觸。當然無人諗過疫情會持續咁耐,而亦都係咁整個幼稚園學年就咁無咗。

「記錄」

人大咗,記性真係差咗,只係過咗一個月,真係都已經唔記得。所以真係有必要記錄郭大少嘅生活點滴,如果唔係真係唔知發生咗啲乜嘢事。要補返之前嘅其實都已經有啲難度。所以都係繼續堅持日日寫啦!因為近排真係比較忙,少咗時間係屋企,郭大少開始有啲怨言,話我唔陪佢。而事實上又真係比起以前少咗好多,只係朝頭早個幾個鐘頭可以陪下佢。希望快啲回覆正常,咁就可以多啲時間陪佢,如果唔係一上小學就真係好難啦。

「成長」

郭大少其實都算係黐身個隻,當然出到街就另一回事啦。由於自細都係我幫佢沖涼同刷牙,而家基本上點都要等我陪完細妹瞓覺之後先肯去沖涼。不過自己真係好攰,通常都瞌著咗。當然心諗點解自己唔去沖涼,又或者叫媽媽幫手。因為其實我已經教識咗佢自己沖涼,只係洗頭要我幫手,其他佢都可以自己一個攪掂。但係諗深一層嘅就係,我可以幫佢沖多幾多年?自己其實係開心嘅,因為證明我係佢心目中嘅地位,只係有時覺得佢太過執著,唔需要下下等我幫佢。相信自己都係嗰啲自我矛盾嘅爸爸!