寫唔寫

「言論」

如果有睇到今日特首點樣回應《國安法》嘅話,其實應該都預咗佢會講乜嘢廢話。基本上《基本法》附件三係一個後門,任何時候其實都可以隨時將中國法律加入附件三。咁當然《國安法》所涵蓋嘅範圍實在太廣同太闊,咁究竟自己仲寫唔寫有關自己嘅睇法同政治相關嘅嘢好呢?當然出得文或多或少都會預咗,只不過今次咁強硬,可見佢哋淨係擔心社會運動繼續落去嘅話係會出事。

「寫文」

好多人有睇開我寫嘅嘢都知道我都會寫一啲關於政治嘅嘢,但係會唔會擔心言論自由?如果話無嘅就真係無可能,但係自己寫文真係為咗記錄每日發生啲乜嘢事!所以當然會將自己每日所見所聞,發生嘅事同物都記錄起嚟。寫唔寫文,點樣寫文,相信好多人都會諗,究竟仲有無言論自由。就好似政府早前打壓香港電台,考評局決定取消有爭議嘅題目,都係收窄緊言論自由。寫唔寫?自己決定啦!

「離開」

其實最擔心嘅就當然係小朋友嘅將來,而好多人今日嘅話題都係環繞移民。相信有家庭嘅朋友都會有咁嘅諗法。當然我亦都唔例外,走其實唔難,只係點樣走,同幾時走?當然孤身隻影係好容易,而其實上一代為我哋移民,相信當時亦都係同一個考慮。以前有可能唔明,但係而家完全明晒。好多人都話,走得就好走啦!其實都真係唔係無道理!