搞電商

「網店」

今個星期好多人都忙於政府嘅《遙距營商計劃》,就算唔係入咗個供應商名單都好多人問,而當中有一項嘅就係建立網店!當然香港最為人熟悉嘅就一定係 Shopline 同掌舖,而海外嘅通常會諗起 Shopify。至於自己起網店就當然離唔開 WooCommerce 啦。Facebook 亦都剛剛發佈佢哋嘅 Facebook Shop,將網店同社交平台結合。至於功能嘅細節依然有待研究,因為目前只開放俾美國用戶。

「需求」

相信今次嘅疫情加速咗大家對電商嘅需求,所以 Facebook Shop 嘅推出引起好多人嘅關注。營運網店都離唔開兩個策略,一個就係 Search Engine主導,一個就係 Social Media 主導,而再成熟啲嘅網店就當然兩邊都會做。好多店舖開始用直播做推廣同營銷,而早前 Shopline 亦都推出咗嚟個功能,當然 Facebook Shop 都唔輸蝕啦,因為佢哋本身已經有 Facebook Live嘅功難。唔知 Google 會唔會都推出類似嘅產品呢?因為佢哋都有 Google Merchant Center 同 YouTube Live。

「整合」

不過相信今次係整合多過取代,因為 Facebook 係同好多電商嘅平台合作,所以應該個模式同而家係 Facebook 專頁嘅 Shop 功能差唔多,如此同時新功能加埋 Instagram 係入面,基本上兩邊食晒。唔好忘記 WhatsApp 都係 Facebook 嘅,所以基本上整個網店營銷嘅渠道都已經覆蓋晒咁滯。當然仲有佢哋最賺錢嘅地方,就係廣告平台啦!所以大家又要諗下點樣變陣,去對應 Facebook Shop。至於好與壞,幫唔幫到客戶銷售,其實依然言之尚早!