考評局

「歷史」

真係估佢唔到,因為一條文憑試嘅問題,竟然掀起一場風波。所有歷史係有值得探討嘅原因!當然歷史係無辦法改變,亦無爭議嘅餘地。只不過題目係考學生嘅理解同辯論能力,咁點解問是否同意「1900-45年間,日本為中國帶來的利多於弊」會有問題?點解教育局局長楊潤雄要要求考評局取消該試題?相信無人會唔知第二次世界大戰日本對亞洲各國所帶嚟嘅影響,只不過係問「是否同意」,咁有乜嘢問題?

「問題」

香港嘅教育係唔係已經去到一個腐爛嘅地步?由幼稚園開始就已經好扭曲,考小學更加為家長同小朋友帶嚟沉重嘅壓力。教育係希望將人類咁多年所認知嘅知識傳授俾下一代,希望佢哋除了解已知,亦都希望佢哋可以用已知去探索未知。如果連討論嘅空間都抹煞嘅話,咁人類又點會進步呢?就好似人類係好耐以前認為地球係平嘅,如果無人去質疑嘅話,大家今日點會知道地球係一個球體呢?

「取消」

一個教育局嘅局長提出嘅要求係因為怕傷害中國人嘅感情?其實點樣損害?佢係唔係覺得學生會覺得「日本真係為中國帶來的利多於弊」?一條試題嘅影響真係咁大?大到要考評局消該試題?老實講我就真係諗唔到有啲乜嘢利!如果唔係美國最後都唔需要用原子彈去炸日本啦!咁係唔係討論一啲更敏感嘅歷史問題就要取消整個考試?如果香港嘅學生連咁簡單嘅黑與白都唔識分嘅話,真係十分之抵打!其實係唔係佢自己對香港嘅學生無信心,定係整個香港教育無信心?