被革職

「革職」

相信打工仔最唔想嘅就係俾人革職,當然有時係因為工作表現,有時因為公司業務,所以俾人炒魷魚。當然好多人都希望公司請佢食肥雞餐啦,只不過始終被人革職點都會唔開心,尤其係大環境唔好嘅情況之下,要幾耐先搵到份新工都係未知之數。就算俾你搵到,環境唔同咗,分分鐘收入都少咗,感覺係有啲徬徨。當然有時在商言商,係無辦法之下都要作出減省人手嘅決定。

「裁員」

因為全球嘅疫情導致無人可以去其他國家工作同旅行,亦因為咁樣而導致共享住宿 Airbnb 嘅收入急劇下降。因此早前佢哋唯有裁員,而一封嘅革職信,除咗令大家學識同過去並肩作戰嘅戰友講分手之外,最要嘅係佢哋無忘本! 一間公司,一個團隊,最重要嘅就係人!就算你點叻都好,如果身邊無人幫你嘅話,基本上你係無可能成功!相信當環境改變同好轉嘅時候,一眾嘅戰友亦都樂意返去幫手,再戰江湖!

「人情」

管理一個團隊已經好難,要管理一間公司就更加難!當然去舊立新係好常見嘅事,而通常換嚟嘅就係俾人鬧冷血無情。不過有時有啲人會覺得公司無咗佢哋唔得,又或者以為自己係好國功臣,所以唔會被人炒。有人情味係一件好事,亦都可能累事。所以分手可以有唔同嘅方法,而且有唔同嘅技巧。唔係每次都係反面嘅收場!今次 Airbnb 示範咗一個完美嘅分手嘅方法,而且贏得全世界嘅掌聲。經過今次嘅事件,相信會有更多人希望疫情過去嘅時候可以加入佢哋嘅團隊!