「記錄」
唔覺唔覺又一個月，本來今日應該寫其他嘢先，但係點都係記錄郭小姐嘅成長緊要啲。當然相比起郭大少，佢冇乜話點樣出去上堂，大部份時間都係同我哋一齊，但係睇得出有個頑皮嘅哥哥，好多嘢都係跟著佢做。正所謂好嘅唔學，學晒郭大少啲曳嘢！當然有時真係俾佢哋激死，因為細妹學阿哥，但係阿哥見到個妹做就話佢曳，無限輪迴。其實邊個先至最曳呢？真係大嘅唔好教壞細！
「十七」
郭小姐而家實在太鍾意食，同太鍾意睇自己啲相。越大就越想食我哋啲嘢，當然食得嘅就當然俾佢試下啦，但係相對郭大少細個嘅時候就寬鬆咗好多。最好笑嘅就係佢知道我哋影佢相，而或者真係女仔嘅緣故，經常性要我哋俾返佢睇我哋影咗佢啲乜，如果唔俾就發我哋嘅脾氣。其實最希望嘅係佢可以瞓好啲，而家晚晚醒咗就唔瞓，真係搵著我哋嚟搞！
「趣事」
今個月應該係第一次帶郭少姐去沙灘，之前應該係上年去沖繩旅行嘅時候。當然開頭死都唔肯落地，不過最後都自己係沙灘行嚟行去。之後當然挑戰小朋友嘅極限，就係去海邊啦。每個小朋友開始到會好驚，當然郭小姐亦都唔例外！但係相對郭大少，佢真係比較大膽，隔咗陣自己已經唔怕仲衝出去。當然事情嘅發展大家都知，就係跌咗落水啦！亦都因為咁，我因為拎住部電話影佢，所以去救佢嘅時候部電話就係咁入咗咸水，報銷咗。
