管理層

「管理」

點解海洋公園會搞到今時今日嘅局面?好唔容易先至捱過逆境,有好嘅盈利,有好嘅團隊,但係點解要換走一個咁做得嘢嘅主席?其實大家應該最記得係盛智文嘅年代,因為好多新嘢都係佢接管嘅年代創造出嚟,就好似萬聖節嘅「十月全城哈囉喂」。而好多嘅獎項都係盛智文年代所獲得,包括國際遊樂園及景點協會博覽會(IAAPA)頒發頂尖榮譽大獎「2012 Applause Award」(全球最佳主題公園),成為首座亞洲主題公園獲得嚟個大獎!

「質素」

一個好嘅管理層係可以扭轉局勢,但係偏偏當情況好嘅時候就換走一個扭轉局勢嘅主席,取而代之嘅係一個大家都唔識嘅人去管理海洋公園。因為一個錯誤嘅決定,搞到海洋公園面臨關門大吉!大家都好期待嘅水上樂園咁點算呢?其實老實講就算而家搵返盛智文都未必扭轉到個局面。況且俾人無啦啦踢走,俾你都唔會再返去啦。不過如果再唔換人嘅話,真係年年係咁蝕,唔通係咁問政府攞錢咩?

「問題」

好啦問題嚟啦,邊個當日踢走盛智文?咁今日邊個叫政府係時候放手?答案就好明顯啦!好多人話海洋公園已經完成歷史任務,又話如果用嚟做地產項目仲符合經濟效益。其實香港係需要一個主題樂園,只係經營不善。當然好多人謀住海洋公園塊地,因為始終係南區,有價有市。如果我哋撇除係唔係集體回憶,究竟海洋公園嘅價值係邊?當然唔係死撐,只係大家應該諗下點解有咁多人想佢死先!