聽音樂

「聽歌」

今時今日聽音樂真係好簡單,唔似以前我哋細個嘅年代用卡式機,要逐首逐首咁樣去錄一盒自己鍾意聽嘅歌。而且仲要計下一面錄唔錄得晒,將盒帶用到盡。當然之後科技日新月異,而今日要聽歌真係好容易,只要你有部手機可以上到網就得。另外就係俾錢一啲唔同嘅平台去聽音樂。當然你亦可以選擇下載到手機入面,就算無咗網絡都唔怕。其實真係唔係好多國家有所謂嘅無限上網嘅服務!

「串流」

唔知大家有無聽開音樂,究竟你用緊邊個平台?相信應該好少人會去買一隻實體碟,除非你真係好鍾意音樂同近年好多人會買嘅黑膠碟。而家真係有好多平台,當中有 Spotify,Apple Music,YouTube Music,KKBox,Joox, Moov 等等。基本上每個都有用過,但係真係俾錢嘅應該就得一兩個,因為有啲歌係一個平台有,一個平台無。好多時係因為版權問題,不過就真係睇下大家想聽乜嘢歌為主。其實睇返啲價錢都唔係好大分別,所以真係未必係考慮課金嘅主要因素!

「選擇」

大家會點樣選擇音樂平台?音樂嘅種類?音樂嘅質素?定係平台嘅設計同更新速度?每個人都有自己嘅喜好,當然平台好唔好用係好緊要。有時真係想搵一首歌都唔容易,所以係平台入面嘅搜尋功能其實係好重要!當然而家好多平台會因應用戶聽歌嘅喜好而推介佢哋認為啱你嘅音樂,只不過有時就係想聽下其他類型嘅音樂,所以太過用戶化未必係好事。唔知大家有無其他嘅條件呢?