打橫嚟

「內務」

其實而家香港係唔係去到一個打橫嚟嘅局面?真係厚住面皮去格硬嚟?究竟係唔係佢哋覺得點就點?內務委員會主席選舉出現爭議,佔議席優勢嘅建議派企圖打破以往正副主席由建制及泛民分別擔任嘅默契,有意壟斷正副主席職位。由於上屆主席民建聯李慧琼角逐連任,交由上屆副主席公民黨郭榮鏗主持主席選舉。民主派提名接近20人參選,極力爭取發言機會,阻擋建制派壟斷正副主席。

「問題」

咁多年大家都係跟規則做嘢,如果真係有問題就應該先解決,而唔係霸王硬上弓!所謂透過秘書處向外界資深大律師所索取嘅法律意見,其實係無實質嘅法律約束力同執行力,因為講到明係意見啦,即係唔係法院嘅裁決啦!咁如果純粹只係一個大律師嘅觀點同意見就可以打橫嚟嘅話,咁係唔係每個市民都可以搵一個大律師去俾啲意見佢哋就可以為所欲為,甚至乎當成法律?

「意見」

當然自己唔係專業人士,不過大家都可以係網上面睇下立法會嘅《議事規則》同《內務守則》。所有嘢都係白紙黑字講到明,如果覺得有需要可以通過正常途徑去修改,只不過一日未選出正副主席,一日都仲未可以進行其他議程。留意返嘅係根據秘書處提交予內會嘅法律意見要點,係「認為」,唔係「確定」或者「授權」上任主席李慧琼有權係新任主席尚未選出嘅時候召開會議,處理內務委員會嘅事務,特別係所謂嘅急切或重要事務!都係嗰句,係意見!