潛行規

「行業」

好多行業都會有自己嘅行規,當然嚟啲行規無人會白紙黑字咁寫出嚟,而且好多時亦都無人會大大聲咁同你講。所以有時係要自己執生!咁究竟邊個定嚟啲行規?老實講好多時都唔知,又或者其實係好耐之前嘅一啲規矩遺留落嚟,就係咁大家只要做就不要問啦!我印象中都好似有俾人問過係唔係新嚟㗎,你邊度㗎,乜你唔知行規㗎咩?有時真係唔係嗰行真係唔知佢哋有乜嘢行規,最好事前去探下風,問下前輩,或者識下嗰行嘅人了解下先!

「警察」

今日有一則新聞話有一名反黑組嘅警察疑似私吞證物轉售圖利!當然好多人或者好震驚,但係自己就覺得類似嘅事件應該都唔係一次半次咁簡單。因為講緊嘅唔係少量嘅毒品!要點樣先至可以私藏兩公斤冰毒?好明顯一個人係做唔到啦!而應該都唔係第一次,所以有可能真係食過翻尋味,越嚟越貪心而俾人調查同揭發。咁究竟有無潛行規?老實講真係無人知,而仲有幾多類似嘅事件,相信都應該有唔少。知法犯法真係罪加一等,咁點樣令市民再相信警察?雖然而家都已經唔信。。。

「行規」

行規有時係希望係一啲情況下互相尊重,就好似君子協定咁,一言既出,駟馬難追!如果用的士收費做例子,好多時搭車都會俾多幾毫子,一嚟司機唔會收毫子,二嚟乘客又唔想要毫子。慢慢變咗做行規,無人會因為俾多錢或者找少錢而爭拗車費。但係有一啲就係橫蠻霸道嘅行規,最主要就當然係保障自己嘅利益,地位同權力啦!而警察自己監守自盜,究竟係唔係有潛行規?你話無都無人信啦!