再出發

「香港」

香港再出發?出發去邊?其實真係要幾咁老土嘅人先至會諗啲咁老土嘅嘢?我諗都係得啲無聊人先至會做!如果你問香港人想出發去邊,我諗而家好多香港人最想嘅就當然係出發去旅行啦!好老實講其實要轉型,要再出發嘅人都已經出發左!我諗只有固步自封同依賴傳統經濟嘅人先至仲未諗到點出發!要重新開始嘅人係唔會因為逆境而停步,反而係加快咗佢哋嘅腳步!

「創意」

香港人真係創意無限!一個 Logo 就可以發揮到咁多嘢!其實問題歸根究底係設計本身,而老實講邊個設計個 Logo?一個 Logo 真係可以影響一個品牌同好多相關嘅嘢,真係唔可以睇小佢。之所以有咁多二次創作,原因好簡單,因為個 Logo 過份地簡單。用藍色個原因就好明顯啦,但係個 Logo 想做到飛機起飛嘅感覺,但係點樣睇都將個 V 字掉轉咗,再加一個箭頭係入面咁囉。想再出發都唔好咁懶惰啦!唔知用咗幾耐去設計個 Logo 呢?

「出發」

香港嘅核心問題都唔係一時三刻可以解決到,當然有人會話自從上年嘅反修例事件開始已經受到影響,再加上突如其來嘅肺炎,導致香港處於嚴重經濟衰退嘅環境。只不過香港人最叻嘅就係執生!只要肯試肯做嘅,大家都會搵出路。而過去所謂嘅乜乜大聯盟真係多不聲數!次次都係虎頭蛇尾,將啲嘢吹到好大,好有目標,但係你再睇,其實所謂嘅牽頭咪又係同一班人!