真跑車

「拍片」

今時今日拍片好正常,而且乜嘢題材都有,因為實在太過方便,隨便拎部手機出嚟就可以。而每個人都可以成為網絡上嘅 KOL(Key Opinion Leader),只不過係邊一方面嘅 KOL 而已。當然有啲係為興趣,有啲就希望知名度高咗就可以有收入。不過網上嘅片真係越嚟越多,要搵有質素嘅亦都唔易。有時有啲真係幾好笑同好有用,有啲亦都無無聊聊,無聊到你睇晒完都唔明點解自己浪費咗十分鐘。

「跑車」

近日最多人討論嘅一定唔係肺炎,而係一條片講乜嘢係跑車!當然我都有睇,不過睇咗一陣真係頂唔順,因為真係笑咗!當然唔知有幾多人睇完都會得啖笑。而今日亦都有人拍咗另外一條惡搞片去笑嗰個人。不過最多人今日做嘅就係影自己架車,然後再睇下付唔付合一架跑車嘅定義。今時今日拍片放上網真係要好小心,因為你隨時變咗做公眾人物都唔知。

「定義」

咁乜嘢係一架跑車?唔諗唔同人有唔同定義,最起碼大家都會認同的士係「紅色的跑車」。好啦講返跑車嘅新定義就係有五大條件!首先係需要配備硬頂開蓬,然後死氣喉要有聲,車身要夠低同闊,座位方面就係趕絕外母型嘅兩座位,而最後就係內籠要新淨!相信如果大家無睇過條片嘅,真係可以去睇下,然後笑一笑!如果你有車嘅話,可以睇下自己架車付唔付合跑車嘅定義!