長假期

「香港」

今個長假期應該係香港咁多年嚟最香港嘅長假期。因為首先無咗好多遊客,尤其係內地遊客。除此之外,所有香港人因為個肺炎都無得去旅行,個個只可以乖乖地咁留係香港。不過亦因為近日香港嘅疫情有所紓緩,個個好似當無事發生,好多地方都好多人。不過大家都困咗係屋企一段長時間,尤其係啲小朋友,所以開始恢復少少活動真係在所難免。希望疫情快啲過,最起碼香港可以回覆正常先!

「夏天」

好難得嘅一個陽光普照嘅長假期,唔知真係覺得夏天已經開始咗。好多人都忍唔住要出去行一行,咁就梗係啦,因為至少過去十四日香港都無新嘅本地感染個案,所以大家都叫做可以鬆一鬆。相信大家過去幾個月都改變咗好多,只係大家都想唞啖氣。係無得去旅行,去睇戲同其他娛樂嘅情況下,唯一可以做嘅就當然係去沙灘同郊外啦。睇下個啲沙灘幾多人!

「外遊」

今次嘅疫情可以話係幫大家返璞歸真,因為真係無嘢好做。四日假期話長唔長,話短唔短,對於家長嚟講其實又真係無乜分別。當然如果小朋友大啲嘅都或者可以盼望佢哋今個月可以復課,只不過如果仍然係幼稚園嘅階段,相信今年佢哋返學嘅機會真係微乎其微。無得去旅行嘅香港人應該好唔慣,只不過幾時先至有得去?相信今年都應該幾難!不過相信仍然有啲人都係會搵命博,玩咗先算!