又報銷

「備份」

有乜嘢慘過無咗部電話?其實每次部電話壞嘅原因都係因為入水,而最擔心嘅都真係無咗入面嘅相。有一次冇咗近一年嘅相,所以超級唔開心,之後真係冇計唯有俾錢將所有嘢擺晒係舊雲上面。真係好怕無晒啲嘢,因為好多回憶係入面。所以備份係好重要,好重要,好重要!真係要講三次,因為啲相無咗就係無咗。而且真係唔好懶同慳嚟啲錢,乜嘢都可以唔見,就係啲相唔可以唔見!

「報銷」

通常乜嘢情況下你最唔想自己嘅電話報銷?當然就係經濟唔好嘅時候啦!每次都係唔想洗錢嘅時候就呢樣壞嗰樣壞,真係唔到你唔信邪!係咁嘅經濟環境,當然要謹慎,因為唔知仲要捱幾耐,所以如果可以頂住先就頂住先,唔好要求咁多。今日因為想影個女,點知亦都因為要救佢所以浸咗部電話落水。都知道大鑊,果然過咗一陣部電話真係開唔返,超級唔開心因為好擔心又無咗啲相。

「好彩」

返到屋企我最想做嘅就當然睇下自己部電話最後幾時備份咗。真係好好彩今次係朝頭早,所以都只係無咗半日嘅嘢,但係其實應該無乜嘢無咗,除咗某啲通信之外。當然今日影嘅相都有少少擔心,不過亦都算好彩,係部機未死之前竟然上載到去 iCloud。真係萬幸中嘅大幸。所以心情叫做好返少少,但係真係又跌錢,因為本來睇下部新機幾時出先至換。