點分析

「數據」

真係唔經唔覺做咗數據分析嚟個行業十幾年,不過咁多年嚟遇到嘅問題都係大同小異。最關鍵嘅問題唔係用啲乜嘢工具去收集數據同分析數據,而係究竟點解要數據!好多公司都覺得數據係免費,就算你用 Google Analytics 嘅免費版本都好,背後其實有好多功夫要去做。正所謂一子錯滿盤皆落索,因為開始嘅時候根本無好好咁計劃點樣收集數據,所以當開始分析數據嘅時候先至發現好多問題,與此同時亦都解答唔到任何問題。

「分析」

好多人覺得做數據分析最緊要係分析嗰部份,但係我可以同你講咁就大錯特錯。其實最緊要嘅係點樣收集數據,所收集嘅數據背後嘅原因,以及該數據本身代表緊啲乜嘢。要有效咁做出最有效嘅分析係需要了解該公司嘅全盤計劃,與此同時要知道牽涉到乜嘢嘅平台同技術。因為最常見係啲數據根本打唔通,出現斷裂嘅情況。然後就會開始問一啲好似好正常但係解答唔到嘅問題。所以唔好睇少事前同事後嘅功夫!就好似做戲咁,台上一分鐘台下十年功!

「謬誤」

另外一個經常遇見嘅謬誤就係以為一個工具可以解決所有問題!對唔住,世界上無一個工具係可以收集所有用戶或者市場嘅數據!要有效做分析係需要唔同嘅工具,然後最緊要係點樣可以將唔同工具嘅數據串連起嚟。現時大部份時候都會將數據傳送到一個 Data Lake (數據湖/資料湖)再進一步整理數據。當數據整理好之後再利用 Data Visualisation (數據視覺化)嘅工具去將複雜嘅數據圖像同視像化。所以簡單一個報表背後所需要做嘅功夫其實係十分之多,唔係你諗得咁簡單!