做內容

「內容」

其實各行各業都需要內容,而內容當然有分好與壞啦,只不過今時今日不論你係大公司定係小企業,網上營銷最基本嘅一定係回歸自己嘅網站。成日話係搜尋器搵唔到你,其實原因好簡單,因為你硬件同軟件都唔得。硬件係指你自己個網站做得好唔好,而軟件係你啲內容做得好唔好。兩者係有關係,互相輝映。無咗邊一樣都唔得。當然仲需要外援嘅幫助,咁你先至有機會係搜尋器得到暴光!

「價值」

做內容真係多有多做,少有少做,但係就千祈唔好唔做!每個品牌都需要內容,只不過點樣先至有效咁將內容嘅價值發揮到最大。其實事前要計劃好內容嘅用途,因為資源有限,所以要一石幾鳥。當然你有無限資源就無所謂,只係當你無咁多內容嘅時候,就需要計劃好點樣做。通常由網站自身出發,然後將內容煎皮拆骨,再重新包裝成唔同嘅內容係唔同嘅網上平台發佈,最後目標就係加強暴光率,同提高搜尋排名。

「成效」

好多人以為做內容只係做一次,其實認真做係真係要成日做,甚至乎日日做。之前荒廢咗自己個 Blog 一段時間,雖然有足夠嘅文章但係始終無新嘅內容其實只可以話靠食老本。雖然只係開始寫返兩個月,但係就已經見到搜尋器開始返自己網站去爬文。不過仲有好多舊文未有時間去執,同真心希望將之前無寫,得個標題嗰啲放返落去。當然亦都希望繼續寫唔好又停,雖然真係好攰。。。