五十七

「時間」

唔知係唔係因為疫情嘅關係,今個月覺得過得好快。好似啱啱寫完郭大少上個月嘅嘢,而家又剛剛一個月。每日依然宅係屋企,唔知今年仲有冇機會返學。學校只係有三日每次大約三十分鐘嘅網上課程,其他都係網上短片同每個星期去學校拎功課。當然進度一定同返學無得比,而最緊要當然係唔好影響到小一面試啦。今個月亦都去咗影學生相,小朋友真係大得好快,過多三個月就五歲了!

「旅行」

本來今個月打算係郭大少考小學之前再去一次旅行,不過因為疫情嘅原因所以去唔到。佢一直好希望快啲到復活節,之前仲係月曆上面黏咗個貼紙幾時出發去旅行。當然我其實唔想佢失望,因為佢好期待,所以之前其實有諗過唔通嘅方案。點知疫情蔓延到全世界,基本上所有嘅地方都已經唔再安全。甚至乎有諗過返去澳洲,點知都係一樣去唔到。好彩嘅係無買到機票,如果唔係都唔知點樣搞。相信今年都無得去旅行,希望疫情快啲過去,可以再帶佢出去睇下個世界啦!

「趣事」

今個月最好笑嘅就係因為復活節,佢有一晚整咗個復活節嘅勞作,點知第二日出街之前竟然整爛咗。佢好驚怕俾人鬧,所以我同佢講我之後幫你啦,唔好喊。跟住我夜晚就幫佢再整過,基本上近乎一模一樣,唔睇細節位其實真係唔知。當然我同佢講下次要小心啲,要放好佢,因為之前已經講過隻雞蛋係好易爛。之後總算叫做有好好放好佢。最起碼過咗兩個幾星期仍然未爛。其實有時係要佢哋自己承擔後果,不過有時亦都要係錯誤中令佢明白唔係樣樣嘢爛咗可以整得返。希望用另外一個方式同佢明白啦,亦都希望佢知道做錯嘢唔係永遠會俾人鬧,唔係大過之後就乜嘢都收收埋埋唔同我哋講。