「壓力」
如果你有壓力你會點樣處理？相信每個人都會有自己嘅唔同嘅方法。當然無人會清楚得過你自己有幾大壓力，甚至乎自己亦都唔知自己有幾大壓力，但係當爆煲嘅時候先察覺就已經太遲。邊個唔想有一個平穩嘅生活？邊個唔想無煩惱？只不過人越大就越避免唔到。問題天天多，尤其而家咁嘅時世，叫大家正面啲其實真係嘥氣。問題天天都多，只係睇下點樣去處理。
「唞唞」
幾時先至可以唞啖氣呢？當問題一個接一個出現嘅時候，究竟處理邊樣先？尤其依家咁嘅時勢，真係想唞啖氣都難。只係想所有嘢歸零之後再重新由頭做起。當然冇嘢係解決唔到，只係用咩嘢嘅方法，同要用幾多時間。有時只係希望可以靜靜地處理問題，同諗方法去處理啲問題。每個人都有難捱嘅日子，有時真係煩少啲就已經幫到好大期望。相信今年大家都應該同我一樣想快啲可以唞啖氣。
「寧靜」
其實我鍾意夜晚做嘢嘅原因係因為真係可以好寧靜，可以靜靜地咁諗下嘢同處理下啲問題。每日都忙於處理唔同嘅工作，每日都只係希望將要做嘅嘢快啲做完。好多時已經無時間去諗啲多餘嘅嘢，只係希望做晒應該要做嘅嘢就已經好滿足。當然已經唔會盼望太多嘢，只係希望可以唞啖氣就已經心滿意足。人生就係咁，無嘢係一帆風順，頂得到逆境，其實就已經贏咗。
