「實驗」
做任何數碼營銷嘅活動都一定會牽涉到兩個範疇，一係做唔同版本嘅測試，再唔係就係個人化。當然市場上面係有好多唔同產品都標榜可以提供呢兩樣嘅服務，而用今時今日嘅科技，要做用戶測試真係非常容易。Google 幾年前就開發咗一個工具 Google Optimize 專係針對做網站測試，而之後再發展到可以用作個性化網頁。不過唯一問題係好多人都唔知點樣先至有效做測試。
「工具」
好多人都未聽過或者用過 Google Optimize 呢個工具。原因係好多時香港好多都係推廣活動，而亦都因為比較少公司依賴網站做生意，所以最多人做嘅測試都只係停留係廣告層面。其實 Google Optimize 係一個同 Google Analytics 結合嘅一個工，因為你可以利用係 Google Analytics 所收集嘅用戶行為再針對性去用 Google Optimize 做用戶測試。最重要嘅係真係好容易用，除非做一啲比較複雜嘅測試，如果簡單嘅真係隨時隨地都可以做測試。
「測試」
係網站做任何測試都係想了解客戶嘅喜好或者偏好。只不過係唔係不停做測試就可以搵到營銷嘅金鎖匙？唔好意思，個答案係，無可能！雖然做測試嘅目的係為咗減少用戶嘅障礙，優化用戶體驗同提高銷售，只不過好多人都會犯同一錯誤。大部份嘅測試都係無一個清晰嘅目標同測試太多嘢，導致好多因素會影響結果。要有效做測試其實事前要做好多功夫，尤其係制定明確而清晰嘅目標。
