大搜捕


個人分享
Tagged With: , , , , , , , , ,

「拘捕」

係唔係因為近日嘅武漢肺炎嘅疫情有所放緩,所以無嘢搵嘢嚟做,開始翻舊帳。如果要翻舊帳,點解淨係翻反對你啲人呢?今日應該係修例事件以來最多民主派嘅人士被拘捕!如果係咁,不如你拘捕所有參與過遊行嘅人啦!其實邊個出糧俾你哋嘅呢?係我哋每一個香港人!唔好成日將法治掛係嘴邊,只因為你哋被授權去執法,如果得唔到認同又有乜嘢用?唔好咁厚面皮啦好唔好?

「政府」

其實究竟係一個無能嘅政府,定係一個無權嘅政府,真係嫌香港唔亂。之前因為修例已經搞到滿城風雨,件事都未平熄又出現武漢肺炎。施政又唔得,管理又唔得,控制疫情又唔得。其實佢係唔係淨係最叻抽水呢?真係破壞香港嘅人又唔走去捉,成日淨係話人哋犯法,咁警隊有人犯法你又點處理?嗰班見人就打嘅人又點?仲有過去近一年嘅種種事件,你又點處理?

「目的」

好揀唔揀,點解揀啲咁嘅時候去拘捕咁多人?其實目的都幾明顯。最近嘅一舉一動都明顯係針對今年嘅立法會選舉!自從區議會選舉大敗之後,當然大家都關心今年嘅選舉會唔會再一次大敗。如果立法會內唔夠建制派嘅議員嘅話,除咗影響投票結果之外,最緊要嘅就係之後好多嘅施政都會受到牽連。所以而家唔搞你幾時搞?有時間都麻煩你處理咗疫情先啦,仲有之後嘅香港經濟!不過算啦,一個無能嘅政府,如果今次唔係香港人自己救自己,相信疫情唔會咁容易受控!