「被逼」
網上因為武漢肺炎大家除咗被創業之外，當然就係被轉型。當然有一部份嘅人因為今次嘅疫情導致無收入，失去工作。係咁嘅市況之下，要搵工都唔係一件易嘅事。當然有啲公司係逆市請人，因為好多人才流入市場，係一個唔錯嘅時機請人。但係亦都有一部份嘅人就要急急轉型，因為就算疫情過去之後都未必有嘢做。有危便有機，好多人只係過唔到自己嘅安全網而已。
「轉型」
好多公司都經常討論要轉型，尤其係數碼轉型。咁究竟點樣轉？點樣開始？就好似零售業咁，無人出街，無人消費，但係點解好多有網店嘅公司生意又會有增無減？就算餐飲業都好，少咗人出街食嘢，但係仍然維持到生意？其實好多時都唔係因為佢哋有啲乜嘢嘅策略，只係好景嘅時候佢哋會嘗試新嘅事物而唔係固步自封。而就正正因為咁可以令佢哋捱得過今次嘅疫情。
「配套」
好多人以為數碼轉型好複雜，但係如果依家仲唔做，以後真係唔使做。因為你都已經關門大吉。而通常轉型第一個遇到問題係改變現有嘅流程，此外就係人！成唔成功唔係用啲乜嘢嘅技術，亦都唔係有錢就得。好多時係工作流程同準備功夫。就好似餐廳咁，個個上網叫外賣但係究竟點樣包裝好的食物真係一個技巧。真係試過有啲平時唔係做開外賣嘅餐廳，送到嚟啲食物變到不似人形。咁就已經令到客戶失去信心，就算想幫襯都唔敢叫外賣。所以數碼轉型唔一定真係好數碼，而係有無適當嘅配套去配合。
