開島了

「開島」

諗咗好耐,究竟好唔好開島呢?因為真係好多嘢做,但係一個二個都玩,最後都係決定開島。最終都係敵不過社交媒體嘅洗版。不過問題係究竟大家會玩幾耐呢?因為我玩遊戲都玩到好盡,一定要玩到冇嘢玩我先至會叫做玩完。所以一啲要長時間上網同浪費時間嘅遊戲我都好少玩。最後就快嚟快去,因為真係無咁多時間。當然希望大家唔好因為淨係疫情先至玩,不過香港就係咁,一係唔玩,一係就一窩蜂咁玩。

「動森」

究竟《動物森友會》玩啲乜?最初真係一個人無無聊聊咁去咗一個島,而你淨係得一個帳幕咁大把。之後就要學點樣收集資源,然後去整唔同嘅工具。基本上不斷重複去釣魚,執生果,捉蝴蝶,等等。當然最終目的就係拎去賣,賺錢同還錢!當你第一日開島嘅時候只係你自己一個玩,不過之後機場開放咗之後就可以去其他地方。見到啲人已經有好多資產,證明真係一玩夜玩,真係好變態!

「創意」

其實遊戲本身最犀利嘅地方就係等大家用自己嘅創意去設計出自己嘅理想居住環境。真係好佩服啲人自己整衫,用好多心機去賺錢買嘢同設計個島。亦都因為創意無限,導致中國要急急咁將隻遊戲下架。不過講真,有時係現實發揮唔到嘅技能,好多時都會係網上出現。因為好多人嘅工作同職業通常都唔係自己最想做嘅嘢,所以好多時遊戲就變咗一個可以俾大家發揮嘅平台!