「騎劫」
好地地嘅一個網上直播嘅演唱會，無啦啦走出嚟係社交平台出篇文，搞到好似同佢有關咁，仲要出埋相拉關係。其實真係可唔可以唔好騎劫人哋做嘅嘢呢？人哋出嚟搞個免費演唱會其實係為咗一班失業嘅通利琴行員工人去籌款。作為一個特首究竟做咗啲乜？老實講除咗自己本來加人工，唔被踢爆都唔出嚟話將自己份糧拎出嚟之外，講真香港人靠你真係死得！
「無恥」
無人會諗過一個特首會無恥到去騎劫人哋搞嘅活動，真係人無恥便無敵。究竟乜嘢心態？不如做好自己先啦好唔好？其實林鄭都唔係第一次，每次都淨係識得抽水，真係唔知係唔係有病？今次嘅疫情其實唔係靠香港政府，而係靠香港人自己。香港當然係我哋嘅屋企，所以香港人自己係會救自己，得你哋啲所謂嘅支援，都唔知幾時攪得惦，真係等到天荒與地老，死咗都無人知！
「價值」
先不討論大家認唔認同人哋搞個免費演唱會，因為實在太多唔同嘅社會聲音。當然時代唔同咗，以前嘅香港真係只要肯捱，肯做就有機會。而時代嘅改變，年輕嘅一代有自己嘅諗法，亦都唔輪到我哋去駕馭佢哋嘅未來。上個年代嘅價值觀係上一代嘅回憶，到最後其實個演唱會只係純粹一個香港人希望做佢覺得應該做嘅嘢。無人應該或者需要評論甚至乎去騎劫佢！
