「嘗試」
好多人都會為生活而擔憂，因為今次疫情嘅影響比起過往咁多次嘅逆境更加嚴重。好多人都開始變陣，因為如果再唔諗辦法嘅話，真係唔知可以捱到幾耐。其實好多嘢都係要迫出嚟，唔試過又點知呢？真係乜嘢都要試，乜嘢都要做，唔好淨係企係度。咁嘅情況下真係要搵多啲人傾計，話唔定有啲新嘢創造到出嚟！問題天天多，凡事都有解決嘅方法，只要一日未死，一日都有希望！
「自救」
今次嘅疫情真係唔知幾時先至完，而受影響嘅人同行業越嚟越多，如果捱得過三月已經了不起，捱到四月嘅真係已經唔錯。要捱幾耐無人知，只不過大家冇可能坐以待斃，等政府嘅抗逆基金等等嘅措施去救自己。其實好多行業除咗要自己救自己之外，今次疫情亦都需要唔同行業一齊聯手咁去互相幫助去渡過逆境！當然有好多嘅行業逆市上升，但係都只係少數。
「計劃」
雖然自己都未搞掂，但係亦都希望可以幫到其他人。自己其實亦都嘗試緊好多嘢，不過希望下星期推出一啲具體嘅計劃幫到一啲人。其實真係有啲恨自己無更多嘅能力去做更多嘅嘢，因為前年嘅決定搞到今日自己都要捱。不過無辦法，當時做嘅決定係基於當時嘅情況。邊度有人估到上年嘅返修例事件同今年嘅武漢肺炎？無計啦，唯有而家捱下，希望明天會更好！大家加油呀！
