「烘焙」
我相信你係社交媒體上面一定有朋友會上載佢哋焗完嘅蛋糕，麵包等等嘅相片。我諗大家真係宅係屋企太耐，所以趁有時間就自己係屋企整下嘢食。當然要焗嘢都要有焗爐先得喇。另外都要基本材料例如酵母，麵粉，牛油，雞蛋，牛奶。而事實上要等麵粉發酵都要一段時間，所以反正而家日日係屋企，不如自己焗下麵包。有小朋友嘅就直頭當埋親子活動，總算有啲嘢做下！
「生意」
近日相信烘焙店嘅生意都會因為疫情而有所增長。平時去開街市間烘焙店基本上都無人行，但係最近就發現多咗人去買材料，相信係因為多咗時間係屋企，又或者諗住同小朋友係屋企整下嘢。就算你唔識焗嘢，而家上網大把教材，你想學整乜都得，當然有影片嘅會更加好。因為發覺有時淨係睇食譜跟住做都未必整得好。所以就算你係地獄廚神都好，而家真係分分鐘練成十八般武藝！
「逆市」
烘焙店當然乜都有，但係佢哋嘅經營模式一般都比較傳統。當然而家有一啲網上店，但係始終有時好多人都未必識得分辨啲麵粉。一時高筋，一時低筋，真係淨係麵粉都已經搞到你暈！之後最緊要嘅過程就當然係發酵，而發酵又有好多技巧。而最誇張嘅係有啲出名嘅網上烘焙店都話自己因為疫情，訂單比較多，出貨時間會延遲甚至叫你落鋪頭取貨。所以真係有危必有機！你點都估唔到烘焙店係疫情下，生意不跌返升！
