買股票


個人分享
Tagged With: , , , , , , , , ,

「股票」

老實講我真係好少買股票,甚至乎覺得買股票係同賭錢無分別。雖然近十幾年都係做數據分析,但係閱做得耐就越知道好多嘢淨係睇數據係有盲點。當然適當使用同有效使用數據係會有好大嘅幫助。但係就好似今次嘅疫情咁,其實無數據可以參考,亦都無嘢可以預測。就算你幾叻都好,基本上好多嘢都唔係你掌握之內,你都會有機會輸。所以我真係嘛嘛哋投機嘅嘢。

「收息」

早前見到有啲人買股票諗住有息收,所以將自己嘅積蓄都放喺一啲大家相對認為好嘅股票,就好似滙豐咁。大家都貪佢派息穩定,而且始終係一間國際銀行,所以諗住一定無問題,一定有息派。但係因為今次嘅疫情,滙豐宣佈今年無息派,而有啲人居然可以話靠股票派息嚟過生活。當然係正常情況下係無問題,只不過大家係唔係唔記得自己係買緊股票呢?派息真係唔係必然,所以點可能話人哋唔派息就啱?無人話過一定會派息,會唔會係你一廂情願呢?

「風險」

我無可否認有好多人可以透過投資買賣去賺到好多錢,但係嗰啲所謂嘅秒秒鐘幾百萬上落嘅真係唔止係過山車咁簡單,直頭係跳樓機咁,可以大上大落。大家都知道去賭場賭錢係一定會輸,你贏係你好彩,因為點樣計你都係會某個機率會輸。所以世界上基本無賭場係會蝕錢,除咗一個人,佢就係特朗普!所以大家要記住嘅係,股票真係可升可跌。人哋真係無同你白紙黑字咁講到明會派息俾你!只係過往嘅紀錄佢哋會啫!都係嗰句,任何投資都係有風險,要做好資產管理,分散投資!