任天堂

「遊戲」

真係好耐無聽過咁多人玩遊戲機,而任天堂嘅 Switch 相信係近年嘅大熱。主要嘅原因係佢方便!係屋企接駁電視又得,拎出街又得,幾部機對打又得,最重要啲遊戲都唔差。佢個手掣亦都係另外一個亮點,因為好似當年 Wii 咁,真係幾特別。當然手機遊戲依然係大行其道,但係始終同傳統遊戲機有分別。而為咗針對唔同群組,任天堂亦都推出平版嘅遊戲主機,當然賣點同電話一樣就係顏色。

「熱潮」

因為個個日日宅係屋企,而家個個都係屋企煮飯,再唔係就係屋企打機。最誇張嘅係咁嘅情況下週末依然好多人去深水埗黃金商場買遊戲機。當然近排最熱門嘅唔係 Sony PlayStation 而係任天堂嘅 Switch。個個為咗玩《Ring Fit》同《動物森友會》冒死都去買部返屋企,而因為疫情任天堂亦宣布遊戲主機會斷貨。相信消息一出又會掀起一股炒賣潮。好彩幾年前買咗,不過都真係好少玩,因為真係無時間。

「無聊」

唔知大家有無因為日日留喺屋企而真係有諗過買部 Switch 返屋企,又甚至乎已經買咗。日日見到啲人係社交媒體不斷上載截圖同影片就已經知道大家都真係好悶。因為疫情大家都真係無乜嘢可以做,除咗驚中招之外,亦都因為好多地方要暫停營業十四日。雖然屋企有 Switch 但係都真係無時間玩,因為實在太多嘢要處理,最多都係開俾個仔玩跳舞,當做下運動囉!