一環扣

「連鎖」

今次嘅肺炎對於好過行業都有重大影響!除咗好多工作都係一環扣一環,而首當其衝嘅一定係航空業,酒店業,旅遊業同零售業。因為各國都封關,基本上所有嘅人都唔會去到旅行,而商業活動亦都只可以透過網上舉行,所以航空公司都真係無辦法,只可以停飛。無人去其他地方,咁當然就無人需要住酒店啦,入住率超低。至於旅遊業就更加唔洗諗,無遊客就等於無收入。而零售業就更加唔駛多講,尤其做旅客生意嘅都相信唔捱到幾耐。

「影響」

當諗起好多行業嘅食物鏈一環扣一環嘅時候,我第一樣諗起嘅竟然係自己以前做網上酒店平台間公司。因為佢哋係全球最大嘅網上機票酒店平台,就算而家有幾多客戶同數據都好,當無人買機票同訂酒店嘅時候,其實亦都係無用。而跟住就諗到香港嘅舊式旅行社,因為基本上除咗老一輩會跟旅行團去旅行之外,年輕一代基本上都上網自己搞掂晒。就算話轉型到網上,基本上無可能,因為已經太多。經過今次嘅疫情又唔知要執多幾多間。

「改變」

今次疫情最頭痛嘅係由下向上咁影響個食物鏈。除咗必需品之外,其實大家都應該都唔會出街買野,就算買嘢都應該係上網店買。當然有危機就有機會,尤其係同數碼科技有關嘅行業。正正因為無得出街,所以個個都只可以上網買嘢。香港實在太方便,一落街乜都有,嚟個係多年嚟點解香港嘅本地網購做唔起嘅原因。只係經過今次嘅疫情,或許會改變大家嘅生活模式,不過疫情過去嘅時候又會唔會打回原形就真係未知之數。