「網上」
個個因為疫情係屋企返工返學，而網上會議，直播，工作坊就當然多到數唔晒。當然係咁嘅情況下，最大嘅挑戰其實係網絡嘅負荷。個個都用高清串流，網絡速度同流量嘅需求十分之大。係香港好彩我哋有光纖寬頻，但係如果你係外國嘅話就大獲，因為好多時網絡供應商都有流量限制。另外網絡速度每個國家都唔同，以致費用亦都唔平，所以係唔係個個都可以無顧慮咁開會同睇直播。
「轉戰」
因為疫情嘅影響之下，好多正常嘅商業活動都無辦法進行。而家唯有轉戰網上！當然相比起沙士嘅時候，科技更加發達，好多方面嘅影響都相對減少。最起碼小朋友有網上教學，公司嘅基本營運亦未至於出現問題。至於好多以前開班收生嘅都急急搞網上工作坊，只不過當中牽涉到好多唔同技術嘅範疇，唔係個個一時三刻都知道點樣去處理。當中當然牽涉到最近 Zoom 嘅保安同安全性問題啦。
「器材」
係市面上其實真係有好多軟件同平台俾大家做工作坊。只不過就算相對熟悉技術嘅朋友都要搞一輪先至可以順利做到網上嘅課程。當然好多人會好有要求，不論畫面質素，甚至乎聲音嘅質素，佢哋都在意。所以見到佢哋啲器材真係佩服，而自己就當然簡簡單單咁去做，因為都唔知個成效有幾高。所以真係唔敢投資咁多器材，更重要嘅係屋企咁細，邊度有咁多位呢？
