逼出嚟

「危機」

對於好多人嚟講,以前係屋企工作可能係一大挑戰,而好多公司都或者未試過咁大規模咁要員工係屋企工作。過去兩個月好多人都應該已經慢慢習慣,係屋企做嘢唔代表量地,亦都唔係冇嘢做,相信好多家長而家先至會明。而對於我嚟講,其實係無分別因為早就已經習慣嚟個模式。好多嘢都係迫出嚟,如果無今次嘅疫情,相信好多嘢都只係原地踏步。所以我經常講任何時候都要處於危機狀態,咁先至會有突破,唔好諗住樣樣嘢都順風順水。

「改變」

究竟因為今次嘅疫情逼咗大家啲乜嘢技能出嚟?好多行業要轉型,呢個係無可厚非嘅事實。要面對改變逆境,大家就會有唔同嘅創意。當然遲嚟嘅轉型,而家個個臨急抱佛腳。不過係一件好事,就係大家終於係疫情下突然覺醒。個個都要搵出路,個個都唔知要捱幾耐。與其抱怨,倒不如積極面對。好多人話今次係人生中遇過嘅最大難關,但係邊個可以估到之後嘅人生無再大嘅難關呢?人總要向前行,只係今次逼大家行快啲啫!

「轉型」

好多人話咁嘅時勢,打工嘅會比較安全。當然某程度上係咁諗,不過你睇下有幾多人要放無薪假期,有幾多人已經失業,有幾多人要諗之後仲有冇工開。好多行業係一環扣一環,好難話置身其外。有啲人打咗一世工,突然失業而又未知疫情幾時過,心理上一定有某啲壓力。不過凡事向好方面諗,或者今次係一個好嘅時機去轉型,因為就算疫情過咗之後,其實好難回複原貌,所以大洗牌一定在所難免!